ഇക്കാലത്ത് മിക്ക ആളുകളും യുപിഐ പേയ്മെന്റുകള്, നെറ്റ് ബാങ്കിംഗ്, മറ്റ് ഓണ്ലൈന് ഇടപാടുകള് എന്നിവയെയാണ് കൂടുതലായും ആശ്രയിക്കുന്നത്. പച്ചക്കറികള്, പാല്, അല്ലെങ്കില് പ്രധാന ആവശ്യങ്ങള് പോലുള്ള എല്ലാ ദൈനംദിന കാര്യങ്ങള്ക്കും ഡിജിറ്റല് പേയ്മെന്റുകള് ഉപയോഗിക്കുന്നത് എളുപ്പമാണെങ്കിലും അമിതമായ ഓണ്ലൈന് ഇടപാടുകള്ക്ക് നികുതി നോട്ടീസ് ലഭിക്കുമോ എന്നുള്ളത് അറിഞ്ഞിരിക്കേണ്ട കാര്യമാണ്.
എല്ലാ ഡിജിറ്റല് ഇടപാടുകളും നിരീക്ഷിക്കപ്പെടുന്നുണ്ടോ?
ആദായനികുതി വകുപ്പ് എല്ലാ ചെറിയ ഇടപാടുകളും നിരീക്ഷിക്കുന്നില്ല. ബാങ്കുകളും മറ്റ് ധനകാര്യ സ്ഥാപനങ്ങളും വലിയ ഇടപാടുകള് Statement of Financial Transaction (SFT) വഴി മാത്രമേ സര്ക്കാരിനെ അറിയിക്കൂ.
ആദായനികുതി വകുപ്പിന് കീഴില് വരുന്ന ഇടപാടുകള്
- ഒരു സാമ്പത്തിക വര്ഷത്തില് ഒരു സേവിംഗ്സ് അക്കൗണ്ടില് 10 ലക്ഷം രൂപയോ അതില് കൂടുതലോ പണം നിക്ഷേപിച്ചാല് അതിനെക്കുറിച്ച് നികുതി വകുപ്പിന് വിവരം ലഭിക്കും
- കറന്റ് അക്കൗണ്ടുകളില് 50 ലക്ഷം രൂപയോ അതില് കൂടുതലോ പണ നിക്ഷേപമോ പിന്വലിക്കലോ റിപ്പോര്ട്ട് ചെയ്യപ്പെട്ടിട്ടുണ്ടെങ്കില്
- ഒരു വ്യക്തി ഒരു ലക്ഷം രൂപയില് കൂടുതലുള്ള ക്രെഡിറ്റ് കാര്ഡ് ബില് പണമായി അടയ്ക്കുകയോ ഏതെങ്കിലും മാധ്യമം വഴി 10 ലക്ഷം രൂപയോ അതില് കൂടുതലോ പണമടയ്ക്കുകയോ ചെയ്താല് ഈ വിവരങ്ങളും വകുപ്പില് എത്തുന്നു.
- സ്ഥിര നിക്ഷേപങ്ങള്, ഓഹരികള്, മ്യൂച്വല് ഫണ്ടുകള്, ബോണ്ടുകള് അല്ലെങ്കില് കടപ്പത്രങ്ങള് എന്നിവയില് 10 ലക്ഷം രൂപയോ അതില് കൂടുതലോ ഉള്ള നിക്ഷേപങ്ങളും 30 ലക്ഷം രൂപയില് കൂടുതലുള്ള സ്വത്ത് വാങ്ങുകയോ വില്ക്കുകയോ ചെയ്യുന്നതും റിപ്പോര്ട്ട് ചെയ്യപ്പെട്ടിട്ടുണ്ട്.
- ഒരു സാമ്പത്തിക വര്ഷത്തില് വിദേശ കറന്സിക്കോ ഫോറെക്സ് കാര്ഡിനോ വേണ്ടി 10 ലക്ഷം രൂപയില് കൂടുതല് ചെലവഴിച്ചാല് ആദായനികുതി വകുപ്പിന് വിവരങ്ങള് അയയ്ക്കും.
നോട്ടീസ് ലഭിച്ചാല് എന്ത് ചെയ്യും?
വലിയ തുകയുടെ യഥാര്ത്ഥ ഉറവിടം വെളിപ്പെടുത്തുന്നതില് നിങ്ങള് പരാജയപ്പെട്ടാല് അത് വെളിപ്പെടുത്താത്ത വരുമാനമായി കണക്കാക്കാം. അത്തരം സന്ദര്ഭങ്ങളില് അധിക നികുതികളും പിഴകളും നല്കേണ്ടി വന്നേക്കാം. ഗുരുതരമായ കേസുകളില് നികുതിയും പിഴയും സംയോജിപ്പിച്ച് 78 ശതമാനം വരെ എത്തിയേക്കാം. ചില സന്ദര്ഭങ്ങളില് വകുപ്പ് പഴയ നികുതി രേഖകള് വീണ്ടും പരിശോധിക്കാം.
ആദായനികുതി വകുപ്പില് നിന്നുള്ള ഈ നോട്ടീസ് എങ്ങനെ ഒഴിവാക്കാം
- നോട്ടീസ് ഒഴിവാക്കാനുള്ള ഒരു മാര്ഗം വ്യക്തിഗത, ബിസിനസ് ഇടപാടുകള്ക്കായി പ്രത്യേക ബാങ്ക് അക്കൗണ്ടുകള് സൂക്ഷിക്കുക എന്നതാണ്
- ഫ്രീലാന്സര്മാരും ചെറുകിട ബിസിനസുകാരും അവരുടെ വരുമാനത്തിന്റെ പൂര്ണ്ണമായ രേഖകള് സൂക്ഷിക്കണം
- ബന്ധുവില് നിന്ന് നിങ്ങള്ക്ക് ഒരു വലിയ തുകയോ സമ്മാനമോ ലഭിക്കുകയാണെങ്കില് അതിന്റെ രേഖകള് സൂക്ഷിക്കുക
- ഐടിആര് ഫയല് ചെയ്യുന്നതിന് മുമ്പ് നിങ്ങളുടെ AIS, ഫോം 26AS എന്നിവ പരിശോധിക്കുന്നത് ഉറപ്പാക്കുക
- തെറ്റായതോ അജ്ഞാതമോ ആയ എന്തെങ്കിലും ഇടപാടുകള് ശ്രദ്ധയില്പ്പെട്ടാല് ആദായനികുതി പോര്ട്ടലില് ലഭ്യമായ ഫീഡ്ബാക്ക് ഓപ്ഷന് ഉപയോഗിച്ച് അവ റിപ്പോര്ട്ട് ചെയ്യുക.
Content Highlights : While using digital payments is convenient, it is important to be aware of whether excessive online transactions could attract a tax notice.